BOMBAIM PALKAR TANNIM APLI KOLA DAKHOILI
- Enclidas de Elly


1892 vorsa Bombaim poiloch Konkani tiatr machier haddlo.  Amcheam tiatrank ek xekddo puro zaun gelo. Amchea tiatrist ho tiatrancho xekddo manoitanam amkam vhodd khoxi bhogta, palkar apli kola dakhoun lokanak urber dourunk vaurteleanchi nanvam nodrek addunk, kaim zannam vixim lokaacho visor poddunk paula tor kaim zannank khobor pasun nasteli ki hannim amchea palkar aplea nanv dovorlam mhunn.

Ami Konkani mollar ailear fokot 31 vorsam zalim, punn jednam ami Konkani kolakaram vixim sodpus korit mhunntoch ami sobar amcheam adleam potranchea karbareank mellun gheun Konkani machier konn asle heam zannam zaupak tancheam adleam sogleam pustokancher nodor marchi poddli ani jem kitem amkam mellta tem ghetlam.  Dubau nam ki amchim him potram poilo tiatr zalolo tedna zolmant eunk naslim, punn adleam nanv-vostea munxeanchim nanvam tankam meulelim ani tim tannim lokam fuddeant dovorlelim, zoxem aiz hanv hea xekddea nimitan bhair sortelea tiatranchea pustokacher dovortaum.

Amchea loka fuddeant sobar potranim zaum amcheam tiatristani pasun mandun dovorlam ki Joao Agostinho Fernandes hannem aplo poilo tiatr machier addlolo mhunn ani taka te "Tiatrancho Pai" mhunn pachartat, punn tiatr boroun machier addpi zaun asa Lucasinho Ribeiro zo poilo eke Italian Opera komponent pordhea pattlean kam kori ani ek dakounn konn porim palkar haddunk zai ti tannem xikun ghetleli.  Tannem aplo tiatr boroilea uprant Joao Agostinho Fernandes, hankam bhettlo ani apli euzonn tachea mukhar dovortoch kaim kola asleleank tannim ekttaile ani ekvottan tannim ho
poilo tiatr machier haddlo,  New Alfred Theatre hantunt, zhoim sodeak amkam Pulis Commissioner-achi kocheri nodrek eta.  Hea tiatrant bhag gheupi kolakar zaun asle zagor zatale tantle.  Karann zagor tiatr zaunche adim choltale ani Konkani lokak apleam kantaram ani arti udexim divirtir kortale.

(Continues....)
Questions or Comments? Please write to us at: thegoanreview@goa-world.com

Special Thanks for the arrangements: Gaspar Almeida
with Fausto V. Da Costa. {Amchea kerit dhinvas Gaspar
Almeida ani Fausto V. Da Costa-k) - Goa-World Team
(Kuwait).