|
ANTHONY
MENDES
Anthony Mendes Dezembrachea 28ver, 1920 vorsa Moddganvam zolmolo. Lhunuchponni
than taka tiatrant nhespachi hurba asli ani vaddeantlea bhurgeank gheun to
lhan concert kortalo. To lhan astanam mosto aslo khuim, punn aplem
lisaum korinastanam ravonaslo, ani khellantui kapaz aslo.
Bombaint ailea uprant to Girgaum-chea St. Theresa iskolant xikonk gelo, ani
thuinch tachi kola porzoll'li ani tachea mestiranchea dolleank vochun tannim
taka iskolachea Inglez concertant "Page-Boy"-achi part dili.
Iskol soddlea uprant to daktteam concertamnim part ghevpak laglo, ani oso ek
pavtt poddlo Joao Agostinho Fernandes, hache nodrek. Tannem Anthony
Mendes-achi huxarkai polleun, taka aplea "Khapri Chakor" tiatrant
ek lhan part dili. Ho tiatr 1936 vorsa, Dadar-chea Antonio Dsouza
iskolachea hollant yalo. Zori hi part lhan asli, tori tannem ti itli
bori keli ki hea fuddem Joao Agostinho, hannem taka aplea soglleam tiatrmnim
ghetlo. Jedna Anthony Mendes palkar novoch artist zaun aslo, tednam to
tiatr-pollenarache monant rigonk naslo. Ani zoxim vorsam bollandlim
titli tachi humed vaddo geli, ani Joao Agostinho, hannem taka aplea "Vauraddi"
tiatrant ek kherit voddekarachi part dili. Ho tiatr zalo Bhangwaddi hollant
ani hea tiatrant Anthony Mendes poilech pavtt dislo Bhangwaddi palkar.
Taka aslo saudik tallo ani utram soddun to kantar kortalo. Rikorddacher
pasun tachim kantaram soddou sutttat. Hachi govia mhollear Amche Noxib
cholchitrantlim tannem gailelim gitam. Survatek Anthony Mendes Inglez
Konkani desent kantaram kortalo ani taka ek kherit jhet aslo. "Khaparika
Banja" & "Wonderful Child", heam tacheam adleam
kantarancho azun adleam tiatr-pollennarank ugddas astolo. Tannem sabar
clown, duettam & trio ghoddleat. Lok taka "Spring" Man
mhonntale, jednam to aplim kantaram mhonnttanam tankta titlo lamb zatalo ani
zaite pavtti motthvoi zatalo dekhun.
Anthony Mendes partik palkar ailo mhunnttoch lok rokddoch hansonk lagtalo,
itlem ki to desent part vo kantar pasun korunk ailear lok taka hanstalo.
Tachea tonddantlem ek utor pasun bhair soronastanam, tachea bhesakuch
polleun lok hanstalo, jea vorvim taka eka tiatr kritikaran title dillo
mhunnon "Comedian-am modlo ek huxear Comedian".
Iskolant astanch Anthony Mendes tiatr borounk survat kel'li. Tannem
aplo poilo tiatr Goem dakhoilolo, zachem nanv "Pandu Barber", zo
uprant tannem 1940 vorsa Bombaint, Bhangwaddi palkar dakhoil'lo.
Tannem boroilelle kaim tiatr zaun asta: "Pandu Barber", "Artimiz",
"Goenkar", "Boborji vo Kuzner", "Pensaum vo Tensaum",
"Kunnbi Irmaum", "Dusreponni Cazar", "Ticli
Sun", "Voneicho Jurament", "Editorachem Noxib",
"Guirannacho Put", "Bekar Zanvoim", "Road to
Mapusa".
Anthony Mendes ek xikxit tiatrist aslo, tosoch boro rit-rovisecho. Sogott
digdorspi tacher khuxeall astale, karann tiatr sur zaunk ek hor asa
mhonnlear khuim to hollant hajir astalo. Brilliant Battery Service,
hantun to tea kallar nokri kortalo.
Anthony Mendes 43 vorsanchea piraier, Marsache 21ver, 1964 vorsa Goem somplo.
Sumar 25 vorsam tannem Konknni palkachi seva keli. Tannem 15
tiatr boroileat ani khum kantaram ghoddleant. "Amchem Noxib"
cholchitrant to boroch porozoll'lo, tech porim Road to Mapusa (1949) hea
tiatrant to porozoll'lo.
Tachea uprant tache tegui put Felix-Xavier-Derrick palkar aile.
Questions or Comments? Please write to us
at: thegoanreview@goa-world.com
Special
Thanks for the arrangements: Gaspar Almeida
with Fausto V. Da Costa. {Amchea kerit dhinvas Gaspar
Almeida ani Fausto V. Da Costa-k) - Goa-World Team
(Kuwait).
|
|
|
