|
M. BOYER
M. Boyer (Manoel Aguiar) ganvan Ponda. Atam Raia Santemoll (Rachol)
aplea kuttumba sangatak tannem pennem kelam. Tannem aplea nanv Boyer,
Hollywood actor, Charles Boyer-achem ghetlelem dista.
M. Boyer poilo dixtti poddlo Bombainchea xarant, Bhangwaddi palkar, Kamat de
Assolna-chea tiatrant. Kamat-an taka ispixial Goeam than haddlolo, hea
tiatrant bhag ghevpak.
C. Alvares Goeant "Jurament" tiatr gheun gelelo tednam, porot
Bombaim ietanam to gheun ailo M.Boyer-ak. 11954 vorsant ani Bhangwaddi
palkar hea C.Alvares-achea "Jurament" tiatrant M.Boyer-an 7
kantaram mhunnllim ani tiatr-pollennaranchi taka vhodd xebaski favo zali,
ani eke rataim modhem to famad zalo.
He hurber M.Boyer-an boroilo aplee likhnnecho poilo tiatr "Bekar
Empregad" zo zalo 13ver Julaiche 1954 vorsa, Bhangwaddi. Ho tacho
tiatr lokank ekdom manoulo, je vorvim to tiatr teach palkar tin pavtti
dakhouncho poddlo.
M.Boyer desent toxim komik kantaramni porzol'lo. To ek bhou voznadik
composer, tech porim komik partint to chodd huxear. eka kallar Souza
Ferrao-Anthony Mendes-M. Boyer 'three greats in Saxtti" mhunnon vetale.
Lhanunch than taka tiatranchi humed asli, ani Bombainche tiatrist Goeam
ietoch to tanchea fattleanuch astalo. Osoch ek disa Souza Ferrao-chea
"Zotkaxi" tiatrant git gavpak taka soeg meulo. Tea poilim
aplea vaddeant chedram laun to tiatr kortalo, ani tosoch Nuvem tachea eka
soirean taka aplea tiatrant ghatlolo. Bombaint Catholic Educational
Institute, hantun xiktanam taka Joao Agostinho
Fernandes, hanchea, "Kunnbi Jaki" tiatrant bhag ghevpak soeg
mell'lo.
Souza Ferrao ani Anthony Mendes, hannim taka bhorpur adhar dilo. Anthony
Mendes-an tor adim-fuddench bhakit korun, taka ek chitt boroil'li ani tantun
oxem mhonnlolem: "Eka disa tum amchea Konknni palka velem ek porzollit
neketr zatolem".
Tache adle famad tiatr mhunnllear: Bekar Empregad, Posko Irmaum, Cazari Put
Sezai, Bacro Parabens, Private Wedding, Amchem Pordhesponn, Bessanv, Burgim
ani Bhangar, Cazarache Ratri, ani uprantle: Sounsar Sudhorlo, Ekuch Rosto,
Ghor Dukhi Gaum Sukhi,
Mog-Kazar-Divors.
M.Boyer-an hozaramni kantaram ghoddleant. Tachim kantaram mhonnllear
vhodd moralachim ani divirtimentachim. "Bhurgim tim konanchim vo
baullim tim mennachim?" hea tachea gitanchim utram azunui kanar
sadoutat. Tachim kantaram akaxvannicher, rikorddancher ani atam
cassettincher aikopak melltat.
M.Boyer-achea chodd xe vixoi
somajik. Dor partistak ttika-ttik part borovop ani partik suadik
"cant" bosovop tache ekdom bore zatale. Azum meren hea
tiatristak 'demand' asa. M.Boyer-Remmie Colaco-Jacint Vaz, ho trio
pezad chol'lolo. M.Boyer, Remmie Colaco sangatak zhupattechim kantaram
mhunnttaloch. M.Boyer zaite pavtti Jacint Vaz-a vangdda komik part
kortalo.
M.Boyer, hannem adlo Prodhan Montri, Sorgest Rajiv Gandhi, hachea fuddeant
pasun ek git gailelem asa. Aple tiatr tannem Dil'li, Calcutta, ani soglleam
Arbi dhesamni dakhoilele asat, tech porim Afrikechea dhesanim ani London-ak.
M.Boyer, haka tachea kolek lagon zaitim imamam favo zalelim asat. Tednacho
Bombaincho Mayor, Dr. Alban D'Souza, hannem taka bil'lo favo kelelo asa.
Te xiva taka State Cultural Award, Man of the Year Award, Gulab
Award, Cine Times Award, ani halinch Kullagar Award, he puroskar favo
zal'le asat.
Tannem aplea kantarancheo tin cassetti kaddleat. Sodeak M.Boyer aplea
kuttumba vangdda Raia jieta.
Questions or Comments? Please write to us
at: thegoanreview@goa-world.com
Special
Thanks for the arrangements: Gaspar Almeida
with Fausto V. Da Costa. {Amchea kerit dhinvas Gaspar
Almeida ani Fausto V. Da Costa-k) - Goa-World Team
(Kuwait).
|
|
|
