|
CARMO
ROD
Carmo Rod Konknni palkacho ek ostad kantorist aslo. To ganvan Osonnecho
(Assolna). Taka also suadik tallo ani to Inglez-Konani kantaram palkar
gaitalo. Tech porim Carmo ek huxear 'Crooner' aslo.
'Nirmonn' filmant 'Nach Atanche' hea Souza Ferrao, hacher dakhoilelea
kantarak sad divpi Carmo. Hem kantar khuim gavpak bhov avdhodd aslem
ani zaiteam zannank dilea uprant fokt Carmo-cheanuch to tem borem korun
gavunk zalem.
Carmo zaiteam digodorspean-cheam tiatramni disla zoxe porim C.Alvares, Robin
Vaz, M.Boyer, Alfred Rose, Jacint Vaz, adi. Tannem sumar panch tori
aple khas tiatr boroileat.
Opinion Poll-a vellar tannem gailelem hit kantar zaun aslem "Don
Panam". Carmo Rod nimano dislo Jephsis Hitler, hachea tiatrant
'Bhaun ani Zhau'. Tea uprant to Kuwait gelo. Kaim vorsam fattim
Carmo Bombay hospitallant somplo ani tache khoxe pormonnem tachi khudd
Goeant voron matiek laili.
H. BRITTON
Cheddvachea vo bailechea rupan hansovpi ani bhulovpi kantaram gavpi tiatrist
mhollear H. Britton. Tachem sarkhem nanv Herminizildo Camilo ani to
Otumbrachea 15ver 1935 vorsa Brittona zolmolo.
Ostorechea bhesan tannem sumar 35 vorsam Konknni palkar tiatr pollenarank
divirtir keleat. Ostorechea bhesan tachim gitam choddxim don
orthanchim astalim ani tiatr pollennaram koddlean to khup xebaski zoddtalo.
1968 vorsa 'Kedna Udetolo To Dis' hea C.Alvares-achea tiatrant. Raia
ganvant tachea 'Saddi' kantarak lagon taka portun-portun 8 pavtti apoilolo
(8 encores).
1970 vorsa Britton-an aplo poiloch tiatr palkar haddlolo 'Ekvottachem Foll'.
Tea uprant tannem anik tiatr boroileat zantle 'Custom Officer' ani 'Jivit
Kuwaitchem' famad zal'le. Tache her tiatr zaun asat 'Bebdo Put', 'Bunhad
Naslelem Ghor' ani 'Ekvottachem Foll". Tannem azun meren sumar
600 kantaram ghoddleant zantlim 'Air Hostess' ani 'Bandra Fest' bhov lovkik.
Tacheo 5 gitancheo casetti asat ani tea bhair tachim gitam
rikorddincher asat.
H. Britton modhench palk soddun sirvise khatir Kuwait gel'lo ani atam gel'li
8 vorsam to Goeam aplea kuttumba sangatak jieta. Azunui to tiatramni
dista ani 'Side Show'-acho ek okhodd khambo.
MANUEL D'LIMA
Manual D'Lima ganvan Porvorcho ani Goeant tiatr boroun to dakhoitalo.
Bombaim ailea uprant tannem aplo poilo tiatr "Eke Oklek Don Noure"
Soccorro Union-achea adharak dilo.
D'Lima akaxvannicher nattkam ditalo ani tachim sumar 100 nattkulim
Bombainche akaxvannir vitraileant. Tache kaim tiatr zaun asat 'Europi Saukar',
'Shakuntala', 'Bism Saib', 'Milagr', 'Khorkos Ostori', ani 'Soddvonddar'.
Uprant D'Lima, hannem palk soddun dilem ani to tiatrancho kontrador zalo.
Tiatr kontradorancho 'Syndicate' pongodd aslo tacho D'Lima vangddi
aslo. Sodeak to aplea kuttumba sangatak Bombaim, Santa Cruz jieta.
TITTA PRETTO
Titta Pretto ganvan Aldona. Lhanuchponnim than taka tiatrachi humed
asli. Minguel Rod-acho 'Ghorachem Kestaum' tiatr pollevpak to ani
tacho ek ixtt veche asle te broech huxir zal'lean dogui dhanvot vetanam,
tachea ixttak ttekxicho dhopko laglo, punn koxei porrim tannim dogaimni
to aklo tiatr pollelo. Tiatr somptoch tacho ixtt rogot vonkun somplo.
Ani haka lagon Tittak dhorun Umerkhaddi bonddkhonnint ghatlo. Punn
morche adim tachea ixttan Titta-cho kainch guneav nam mhunn boroun dovorlelean
to suttlo.
Titta poiloch ailo Frank de Sta. Cruz, hachea tiatrant. 1952 vorsa
Minguel Rod, hannem digdorxit kel'lea 'Disgras' tiatrant Titta nhesla.
Uprant to zaiteam direkttorank nhesla zoxe porim Saib Rocha, J.P.
Souzalin, M.Boyer, Remmie Colaco, Prem Kumar, C.Alvares, adi. Titta,
hannem khas boroilolo poilo tiatr 'Chikott ani Pankott'. Tache her
tiatr zaun asat 'Soitanachi Tainni', 'Xevott Krimidoracho', 'Mogak Lagon',
ani 'Pai Chol Ghara'.
Titta, hannem palkar 'character', komik ani ostorecheo bhumika keleat.
He xivai to ek kantorist ani komik kantaram gaita. Tachea
kantarancheo tin cassetti asat.
Tiatrista xivai, Titta ek kontrador ani zaito kall tannem dusreanchea
bhagak ravon, tiatranche kontrad ghetleat ani azunui gheta.
Questions or Comments? Please write
to us at: thegoanreview@goa-world.com
Special
Thanks for the arrangements: Gaspar Almeida
with Fausto V. Da Costa. {Amchea kerit dhinvas Gaspar
Almeida ani Fausto V. Da Costa-k) - Goa-World Team
(Kuwait).
|
|
|
