REMMIE
COLACO
Remmie Colaco Setembrachea 9ver, 1925 vorsa Sanvorddem zolmolo. Survatek to ganvchea iskolant gelo, zhoim to Konknni (Nagri lipin) xiklo ani tech borobor ganvche igorjechea iskolant muzg xikonk laglo. Chear vorsam muzgaponn vachunk-borounk, ani rebek vazouk xiklea uprant tachea bapain taka Bombaim velo. Bombaim to Wadala aslelea St. Joseph English School, hantun xiktalo. Iskolant gavpachi spordha zatali tantun bhag gheun Remmie apli kola dakhounk laglo, tednam taka Principalan igorjechea choir-ant ghatlo. Heach iskolant tednam nanvosto Hindi film kolakar Shammi Kapoor xiktalo. Remmie-chim kantaram aikon, Shammi tacho ek vhodd ixtt zaunk paulo. Iskolachea Concertamni, Remmie ani Shammi sangatan bhag ghetale khuim. Remmie Sewree ravtalo thuim 'Jolly Boys of Sewree' nanvacho ek pongodd also. Tannim Parel, Damador hollant ek tiatr diunk ieujilo. Tiatrachem nanv zaun aslem 'Bhaguintlem Ful'. Tachea bapaichi porvangi gheun, tannim Remmiek mukhel ostorechi part dili. Ti part tannem itli huxarkaien keli ki "Goa Times" portran tachea voir ek vhodd borovp kelem. Heach pongddan anink ek tiatr dakhoilo St. Xavier iskolachea hollant ani Remmie fokot don kantaram mhunnpak soeg dilo, ek duett ani ek trio. Hea tiatrant her 'professional' tiatristamni bhag ghetalo zoxe porim: Souza Ferrao, Dioguinho D'Mello, Anthony Vaz, Edward Almeida, adi. Remmiechim donui kantaram aikon heam 'professional' tiatristamni taka borich xebaski favo keli. Xipok sompoilea uprant Remmie Sewree than Dhobitalao ravonk ailo, jednam Edward Almeida, ho tiatrist tacho ek boro ixtt zalo. Ani Almeida, hannench taka 'professional' palkar poiloch aplea 'Maim', hea tiatrant ghatlo ani ostorechi ek lhan bhumika dili. A.M.B. Rose, ani Almeida, hanchea sangatak Remmie, hannem don duettam mhonnllim, tim aikon C. Alvares, hannem tacher dollo dhorlo, ani don mhoineam uprant C.Alvares hannem taka aplo "To ho Tiatrist?" hea tiatrant ghatlo. He toren 1944 vorsa Remmie Bhangwaddi palkar choddlo.  Azun meren Remmie Colaco-n ek hozar voir tiatramni vantto ghetla ani sumar 500 voir kantaram ghoddleant. Remmie muzg xikla mhunnttoch tannem aplek khas sur ghoddun tancher utram bosoileant, ani thoddeam Inglez surancherui kantaram asat. Tachi kantaram azunui akaxvannier aikonk melltat. Kaim vorsam fattim Goenchea All-India Radio kharbareamni 4 vegllea bhasanchim boreantlim borim kantaram vinchun kaddlelim - ek Inglez, ek Hindi, ek Purtugez ani ek Konkani. Ani hea Konkani kantar zaun aslem Remmie-chem "Ankuar Moriechem Dukh". Remmie Colaco, hannem aplo poilo tiatr "Satvo Sakrament" 1955 vorsa machier haddlo ani lokancho abru zoddlo. Azun meren tannem sumar 13 tiatr boroileat, ani tantle chodd lovkik mhollear "Satvo Sakrament", "Bhauponnacho Kaido", "Chouto Mandament", "Sukh Tarvotteachem", "Zolmancho Gaum", "Ghorachem Suk", "Don Kallzam" ani "Atancho Teomp". Survateak ostoreacheo bhumika korun, uprant Remmie daddleache 'character role' korunk laglo. Ostori bhesan tannem C. Alvares-achea vangdda khup duettam gaileant. Apleam kantaranchi tannem ek kessett kaddun dovorlea. Goenkarank divirtir korunk Remmie khup bhaileam desamni gela zoxe porim Afrikek - Nairobi, Moshi, Dar-e-Salaam, Tanga, Mombassa, ani sogllea Gulfachea ganvamni. Ganvche torneam kolakaranch-ea angant kola asaa ti voir kaddunk Remmie-n ganvchea vigarachea adharan Talent Contest suru kel'lem. Hi spordha azunui chalu asa. Ani hea spordheant bhag ghetele zaitea tornatte aiz "professional" tiatrist zaunk pauleat. Remmie Sanvorddem, aplea ganv-ghora aplea kuttumba sangata jieta. Questions or Comments? Please write to us
at: thegoanreview@goa-world.com Special
Thanks for the arrangements: Gaspar Almeida |
| |||||||||||||||||||||||||||||||||||