|
SHALINI MARDOLKAR
Konkani palkar bhou natural bhumika
korpi ostori ek Shalini Mardolkar. Shalini Aogostachea 15ver, 1939
vorsa, Mardol, Goem zolmoli. Shalinink Konkani palkar 'professional'
tiatrant Anthony Franklin, hannem aplea 'Bhau' tiatrant mukhi partint
haddleli. Bhurgechponnim than Shalinichea rogtant nattok kola asli. Ticho
'Shalini Songit Mandal' mhunn khas pongodd aslo. Hea pongddanctlea
nattkamnim tika bhurgeacheo (lhan cheddum vo cheddo) bhumika ditale. Tancho
pongodd chodd so Zatreak, Morathi nattkam sabar ganvamnim palkar haddtale.
Survatek tem Morathi ani Gujaratti nattkamnim bhumika kortalem dekhunuch
Shalini ekdomuch nizacheo bhumika korta. Morathi
ani Gujratti nattkamnim 'perfection' polloitat, ani digodorspi aplea kolakaram
koddlean ekdom nizacheo bhumika korun ghetat, ani hacheach vorvim Shalinichem
machier vagop, uloup ani paulam marop ekdom somik (natural).
Franklin, hanchea 'Bhau' tiatrant Shalinin, C.Alvares-achea sangatak mukhel
part kel'li. Hea tiatrant Anthony Mendes, Souza Ferrao, adi. Osle
voznadik tiatrist asle. Shalinin, Anthony Mendes-a vangdda hea tiatrant
ek comedy duett gailem. Tea upranta taka C. Alvares, hachea 'VOJEM'
tiatrant bhag gheuvpak soeg meulo, ani hea tiatrant Shalini vhodd fank
zoddunk pavlem.
J.P. Souzalin, hachea ' SAT DUKHI' tiatrant Shalini Saibinnichi bhumika
keli ani tea uprant Souzalin-achea soglleam tiatranim bhag ghevpak tika
soeg favla.
Tea xivai Shalinin anink khup digdorspeancheam tiataranim bhag ghetla
zoxe porim: Jacint Vaz, Robin Vaz, Anthony D'Sa, Prem Kumar, M. Boyer,
Alfred Rose, adi.
Gitam gavpantui Shalini huxear. Anthony Mendes, hachea vangdda tem
khup pavtti komik duettam giatalem. Te xivai M. Boyer, Master Vaz, Robin
Vaz, Jacint Vaz, hachea vangdda duettam, trio, chouke gaitalem.
Punn jednam tem Souzalinchea tiatraant 'character role' kortalem,
tednam tem kednanch side-show-ant vantto ghenaslem khuim, karann 'character'
pirddear zata dekhun. Shalinichea suadik
talleachi modurai amkam 'Nirmonn' filmantlem 'Dhol Mhojea Bai' hea gita
vorvim kollta, jem azunui amkam aikon xem dista.
NIRMONN ani MHOJI GHORKARN, heam donui Konknni filmaamnim Shalinin mukhel
bhumika keleat. 1966 vorsa taka NIRMONN
filmak 'Best Actress' puroskar favo zalo, zo tika, adli Prodhan Montri
Smt. Indira Gandhi, hechea hatantlean bhettoilolo. NIRMONN film kaddlem
teach vorsak Shalinichem logn tea filmacho digdorspi ani nanvosto Hindi
cholchitr digdorspi, A. Salaam, hache laguim zalem.
A.Salaam, hannem-i Konknni kolek khup dilam. 1963
vorsa tannem AMCHEM NOXIB digodorxit kelem, zalear 1955 vorsa NIRMONN
ani uprant MHOJI GHORKARN cholchitram tor tannem aplea khasgi 'finance'-an
kaddlelem.
Shalini atam Konknni tiaramnim khup komi dista, ani hachem karann mhollear
atam kuttumbak lagon taka titlo vell gavonam. Te xivai tem apunn
korta tea tiatrachi bhumika pollelea bogor digdorspeak kednanch utor dinam.
Somplolea C. Alvares, hannem kaddlealea FAXI MOGACHI konknni video filmant
tem borem porzoll'lam. Tachem hit Hindi film mhollear TAQDEER, jem
NIRMONN, hea Konknni filmacher attaplelem.
Gelea vorsant Shalininin Goeant aplo tiatr SOUNSARCHO GADDO machier haddlolo,
punn heam proigam vixim tem khoxi zalem nam, karann sangati kolakarancho
boro sohokar mell'lo nam dekhun.
Shalinin anikui tiatr boroileat, punn machier haddunk nant, karann tika
'perfection' zai, ani Konknni palkar aiz-kal, don-tin ensaio marun tiatr
machier haddtat, tem tika bilkul mandonam. Ani
halinch tannem Goeant tiatr dakhoilolo, tacher tem odhik xiklam.. Adleam
tiatristam porim atam sangati tiatrist kainch sohokar divpi nhoi, ani
hatak hat dhorun cholpi munis nhoi, hem sot tika pottlam.
Shalini aplea kuttumba sangata Bombaim, Khar jieta.
Questions or Comments? Please write
to us at: thegoanreview@goa-world.com
Special
Thanks for the arrangements: Gaspar Almeida
with Fausto V. Da Costa. {Amchea kerit dhinvas Gaspar
Almeida ani Fausto V. Da Costa-k) - Goa-World Team
(Kuwait).
|
|
|
