JOHN
CLARO Konkani palkar tiatrancho xekddo proig korun namnnea zoddlolo tiatr-boroupi mhollear John Claro Fernandes. To Kepenchea Amonna ganvcho ani 1930 vorsa zolmolo. Taka Konknni palkacho khup onubhov as ani tiatr itihas sodhun kaddunk ani xikhun ghevpak tannem khup proitn keleat. John Claro Konknni romanxi vachun Konkani kosi boroitat ti xiklo. Veglle-veglle tiatr polleun te koxe boroitat, bosoitat ani sonvad koxe boroitat tevui xiklo ani tannem poiloch aplo tiatr Camil Botlear boroilo. Tiatr borovpachi chal tannem Minguel Rod-achi vapuddli ani tiatrache kant khuim M. Boyer, hannem bosoile, ani to tannem aplo tiatr poiloch aplea ganvant Kempem festadis dakhovpak tharailo, punn ganvcheam munxeamni pulitik korun tacho tiatr dakhovpa boldek Remmie Colaco, hacho tiatr dakhoilo, ani he tore Claro, hannem keleli soglli toiari funkott geli. John Claro uprant nokre pasot Bombaim ailo ani tednam to Anthony Mendes, haka bhettlo. Mendes-an tacho tiatr vachlo ani Bhangwaddi palkar dakhovpachi toiari keli. Ho tiatr Dezembranchea 25ver, 1951 vosa Bhangwaddi palkar dakhoilo, zantun Master Vaz, A.M.B. Rose, C. Alvares, Andrew, Anthony Dsa, Anthony Mendes, Souza Ferrao, heam famad tiatristancho aspav aslo. Ani ho tiatr digdorxit kelo Souza Ferrao, hannem. Tea uprant John Claro, hannem anik khup tiatr boroun palkar haddlet zoxe porim Nirmileli Sun, 25 Vorsamni, Purtugez Kolvont, Rinnkari Zanvoim, Gupit Karann, Inglez Madam, Vinglli Nachpinn. Tacho bhov lovkik zallo tiatr mhollear Purtugez Kolvont, zache 100 vhoir proig zaleat. John Claro atam sumar 40 vhoir vorsam Konknni palkar vaurta. Azunui to aple tiatr palkar dakhoita, je pollovpak lok hupott ghalun ietat. He xivai John Claro ek suspense romanxi borovpi ani adlea kallar Sot Uloi, Goa Times, Cine Times, heam potrancher tacheo sankholi kannio uzvaddak ietaleo. Konkanni tiatrachim 100 vorsam palllim, tednam John Claro, hannem khup thokos gheun tiatrachea oromba vixim sodhpus kelea ani korit asa. Tiatristancheo zaiteo sounstha utponn zaun melea uprant. 4 vorsam fattim Konknni Tiatristanchi Sounstha ghoddun haddleli ticho fuddakar tor tannech ghetlolo. Uprant atam he-ui sounstha jhemeta. Sodeak to aplea kuttumba vangdda Kepem jieta, ani azunui palkar tiatr dakhoita. PHILOMENA BRAZ Philomena Braz ganvan Oll'le-chem (Orlim), punn zolmolem ani vaddlem Bombaim. Tis vorsam voir Philomena Konknni palkar jinsaver bhumika korta. Tem poilench Konknni palkar ail'lem Alfred Rose-an digdorxit kel'lea "Zottkaxi Dorji" tiatrant, 1963 vorsa. Tea uprant tannem zaiteam digdorspeancheam tiatramni bhag ghetlolo asa, zoxe porim: Saiba Rocha, J.P. Souzalin, Kid Boxer, Prem Kumar, Jacint Vaz, Alfred Rose, C. Alvares, Dod de Verna, Nelson Alfonso, Kamat de Assolna, adi. Konknni palkar Philu, hannem sabar torencho bhumika keleat zaum komik, dukhest, zogddekarnicheo, matharecheo, sasumaicheo ani sunecheo. Prem Kumar, C.Alvares, Alfred Rose, M.Boyer, hancheam tiatramni taka kherit bhumika astaleot ani tantun tem aple kolechi khopxi dakhoitalem. Bhumika korpa xivai, Philu Konknni palkar kantaram gaitalem zaum clown, duettam, trio ani chouke. HMV rikorddancher ani Konknni kesettincher tannem zaitim gitam gaileant. Philomena, hannem tiatr borovunk nant, punn somplolo Anthony Ferns (Vakola) , hacho "Axechi Doxea" ho tiatr tannem digdorxit korun akhea Bombaint dakhoilolo. Philomenacho poti, Barnabe Braz (Chinchonnem) ek tiatr mogi ani kaim pavtti to tiatramni nhessla. Teach porim Philu-chi bhoinn, Celine, Konknni tiatramni nheslam ani gitam-i gaileant. Tiatramni nhespak Philomena nhoich fokot Indiechea bhagant bogor Gulf desamni pasun bhonvddi korun ailam. Azunui tem tiatramni dista. Tem aplea kuttumba sangata ravta Dockyard Road, Mazagaon. Questions or Comments? Please write to us
at: thegoanreview@goa-world.com Special
Thanks for the arrangements: Gaspar Almeida |
| |||||||||||||||||||||||||||||||||||