SEBY COUTINHO



Seby Coutinho, ganvan Cortalim, vaddlo Colvale - Bardez.  To zolmolo Bombaim September 5ver, 1929 vorsa.  Dabulantlea St. Sebastian High School-ant to xiklo.  Iskolant astanam taka acting korpachi ani gitam gavpachi interest asli.

Kovita vachpant to boroch huxar aslo ani kovitam spordheant sodance inamam zoddtalo.  Iskol sutt'toch to fokannam ani acting kortalo, dekhun taka tachi sangati Charlie mhunnon pachartale.

Taka Bhangwaddi palkar poiloch haddlolo Ernest Rebello, hannem aplea Avoicho Gutt tiatrant.  Ha tiatrant tannem Joao Bautist Lobo ani Miss Marikin, hanchea vangdda vantto ghetlolo.

Inglez concertanim Seby lhan-lhan bhumika kortalo. John D'Cunha hannem taka tiatr borovpak utejonn dilem, ani Seby-n borilolo aplo poilo tiatr Ekloch put. Fort-ant ravteleam apleam ixttank gheun tannem ho tiatr 3 zageancher dakhoilo.  Uprant tannem boroilo Curddo Millionar ani 1953 vorsa dakhoilo Cama hallant. He donui tiatr tannem, Fort Dramatic Co. hachea asrea khala dakhoile.

To 'professional' tiatristam borobor titlo bhonvo naslo.  Francis Carneiro (Chicken) hanchea adharan tannem Goan Dramatic and Cutural Society ghoddli, gheun sangatak Cajdon D'Souza, Rico Rod ani Vincent Semedo.  He Society vixim to titlo stisfeit naslo dekhun tannem 'band leader' B. Paul, hanchea adharan C. Alvares, hachea BORVANSO tiatrant entrad ghetlo ani hea tiatrant don kantaram gailim, punn to ek kantorist koso ies zoddunk paulo nam, dekhun portun to 'professional' tiatristam sangatak disonaslo.

Tea khallacho make-up man, Camilo, hachea vorim Seby Coutinho-k, Alfred Rose-achea Yench Tem Karann tiatrant soeg mevlo.  Tannem ek kantar gailem, tori taka tiatr pollennaramni mandun ghetlo nam.  Uprant Alfred Rose, hannem, taka aplea Dotor-Advogad tiatrant ek 'role' dilo,  zantun Seby boroch prozoll'lo, ani hea vorvim to duream direkttoranchea dolleamni gelo. Hea tiatrant tannem 'villian'-achei part keli, ani ti itli bori keli ki eka kritikaran taka potrar pacharlo mhunnon Konknni palkacho 'PRAN'.

Tea uprant Seby zaiteam 'professional' digdorspeancheam tiatramnim ieunk laglo.  J.P. Souzalin, hanchea kaim tiatramnim tannem bhag ghetlolo, tosoch C. Alvares, Prem Kumar, Alfred Rose,
M. Boyer, Robin Vaz, hanchea khup tiatramnim tannem vantto ghetla.  Konknni palkar parti korpant to poilea zagear urtolo 'actor' mhollear lottkem zaunchem nam.

Tacheo boreantleo boreo partri Khorkhos Ostori, Aungounnechi Okol, Vauraddi, Atam Konn Ghatki, Barabas, heam tiatramnim zaleo.

Tannem boroilele tiatr mhollear Ekloch Put, Curddo Millionar, Maka Guneav Bhogos, Amchea Disgras, Mhozo Oprad, Avoicho Ulhas, Imtteachea Bhognnar.

Goenchea lok-nach xikovpachi Seby-k ek kherituch kola asli.  Tannem zaiteank amchea lok-nach xikoileat. Amchem Noxib ani Bongllant filmamni tannem bhumika keleat.  Seby Andheri Bombaim, aplea kuttumbachea sangata jietalo, to 1999 vorsa somplo.

Questions or Comments? Please write to us at: thegoanreview@goa-world.com

Special Thanks for the arrangements: Gaspar Almeida
with Fausto V. Da Costa. {Amchea kerit dhinvas Gaspar
Almeida ani Fausto V. Da Costa-k) - Goa-World Team
(Kuwait).