TIATRANCHO BHANGARACHO JUBILEO

Jednam aum fuddem sorlam celebrar corcunc Bhangaracho Jubileo Konkani Tiatrancho, maca goroz poddta thodi contha diunc atanchea tiatristanc ani connac favo ti poili manadic suat hea caman.  Hi khobor azunuim conn nokllo hea pasot maca khoxi hem tumcan collit corunc aum morchea adim thoddeach utranim.  Thoddea matare mojea tempa vele zanno zatele ki Konkani Tiatr zaunche adim Bomboi zatale mhunn zagor ani heam zagranc lagon Goencaranc porko loc anstalo.  Durea tiatr ditale amchea Goencar punn tevui Ingez ani Purtugez bhaxen.  He ditale membro Instituto Luso Indiano-ache vorsak ek vo don pautti Gaiety Theatrant (Capitol Cinema) ani Cawasji Hallant, Dhobitalao.  Tancheach tiatr ditale divirtiment Goencaranc tea tempar sumar 1890 vorsa.  Italian Opera Componi ditali aple Opera Bomboi ani teach tempar somplolo Sr. Lucasinho Ribeir paulo Bomboi.  Taca tanche Opera bore mandlet ani chintlem tannem chakri meutaat zalear polleunc tanche pordhe samballunc ani pollounc, kiteac to dusrem cam noco aslo ani hea passot conn eklea Goencarac fuddem ghalun taca mevli sirvis prodhe pollounk thoddea pagan.  He Componechea borobor to bhonvlo Poona, Madras, Simla ani Calcutta uprant ti Componi Burma vechea adim tannem chakri soddli ani ailo Bomboi motint dorun tancho ek dakhttulo Opera.  Bomboim tannem ixttagot keli somplelea Caitaninho Fernandes (Taleigaum-cho) ani he dogui vavranc lagleat burgue soddunk parti diuncheac, punnn chodd cottin tancam poddlem burgue mellunc carann tea burgeanc somzolem to tiatr zait mhunn zagor.  Motti oddchonn zali Sr. Ribeirac Tiatr ubo corunc ani tannem as soddlli. Sr. Caitaninho, zo vortoulo empregad Bombay Gazette, to ek dis auchit maca meulo ani sangli khobor tiatrachi ani tache borobor eka Aitaradis aum gelom Sr. Ribeirac mellunc Picket Road.  Amchi vollok zalea upgrant aum sodam sanjecho sirvisecho suttoch Sr. Ribeira sorvex vetalom ani mozo vell pasar cortalom
dogainchea sangatac.  Ek dis ami tegainuim chintlem burgue sodonc cuddant vochon ani oxem toxem corun amcam meulet dog zann, tantlo eklo azunium assa Goeam, ani to Sr. Agostinho Mascarenhas.  9 zann burgue zai asle to Opera ghalunc stagir ani zonn eklean don tin parti gheun essai marunc laglet sodam sanjechi, tiatr ubo corunc.  Deklea uprant amchi toiari Sr. Ribeiran buniad marli Konkani Tiatrachi, 5 actoranc sangatac gheun Rodond bhonglea sorxem, Picket Road, Febrearacha mhoineant 1892 vorsa.  Ani teach vorsa Abrilant dacoilo tacho poilo Konkani Opera ITALIAN BURGO, New Alfred Theatre-ant, jem ghor aslem, atam Pulis Commissionerachem Head Office asa thuimsor.  Ho poilo tiatr polloun loc ojeap zalo bhou corun Opera, hea cantaram ani tuad aikun ani viludachim dressam poloun, jim Sr. Ribeiran sovai ghetlelim te Compone lagchean (second hand).
Buniad ghott keli ani uprant Sr. Ribeiran dileat Alladin, Ali Baba ani Carlos Magno, he sogott Goa Portugese Dramatic Componichea nanvan.  Kuddnattcai bhitor sorli ani dusreache budhin Sr. Ribeiran amca sanddun anic Componi caddli Ribeiro & D'Cruz Opera Co. Modecat aitim Clubam zolmolint, thoddim vorsam vanchun melint, tim him Clubam: Lusitan, Dona Amelia, Dom Carlos, Douglas Comic Opera, Karachiwallas Delectable Company, Goan Union, Lazarus Comic Opera, Goa Nacional.  Him sogllim Clubam nattac zalim eka-meka fattlean, focot ekuch amchea modecat zaunui asa tem Sr. Rocha-chem Club, Union Jack.  Heam 50 vorsam modhem avem boileat 27 drama Comedi.  Tantle 16 aven stagir ghaleat ani 11 duinche urleat.  Heam 27 antle focot 4 Tiatr avem utraileat her sogle mojem  ghoddop. Poili manadic suat favo dubau nam somplelea Sr.
Lucasinho Ribeirac.  Aum moji tokli bagoitaum Sr. Ribeirachea fonddar, zo vortoula mozo mistir hea tiatrachea caman ani tacho marog aum azunui choltam moriadic ani sincounneche tiatr dacoun mojea ganv bhavanc.
- Joao Agostinho Fernandes (Ave Maria 28th Nov. 1943)

Questions or Comments? Please write to us at: thegoanreview@goa-world.com

Special Thanks for the arrangements: Gaspar Almeida
with Fausto V. Da Costa. {Amchea kerit dhinvas Gaspar
Almeida ani Fausto V. Da Costa-k) - Goa-World Team
(Kuwait).