MISS
LORNA Miss Lorna Cordeiro ganvan Saliganv (Saligao), Bardez. Apleam suadik tallea vorvim Lorna-an taitr pollennaranchea kallzamni apleak ek kherit zago melloun dovorla. Lorna-cho avaz ani tachim kantaram tiatr-mogi kednanch visorpak nant. Konknni mollar to ek tallo zaun gelo, zo sodanch omor urtolo, ani sodanch kanar sadoutolo. Iskolant xiktanam Lorna-k, tednache famad songitkar Raymond Alburquerque, hannem Bandra Fair-ak show zatale tantun gavunk soeg dilo. Lorna-n "Underneath the Mango Tree" hem Inglez git gailem ani Brandra-chea lokanchim kallzam jikhun ghetlim. Magir taka gavunk zaite soeg mellounk lagle. Teach kallar Chris Perry ek gavpinn sodhtalo, ani to Lornager pavon sorlo. Tanchea ghorantuch Chris Perry-n, Lornachem 'audition' ghetlem, ani Lornachea talleachi khollai taka somzoli. Tendna Chris Perry songit mollar ek raza zaun aslo, ani choddan chodd kazarank ani show-ank vaovpache kontrad takach melltale. Survatek Chris-a vangdda Lorna-n Calcutta-chea Firpose, he 5-star hottellachea Lido Bar-ant gavpak survat keli. Hangasor Lorna Ingez gitam gaitalem. "Mac the Knife" gita vorvim tannem Culcutta-chea lokanchim kallzam jikhon ghetlim. Lorna Culcutta-nt borench famad zalem. Lido Bar-ant lokanchi gorddi zaunk lagli, itlem ki admim fuddench 'house full' mhunnn Lido Bar-a bhair thoktto launcho poddlo, karann Lorna-cho tallo aikopak adim fuddench zage sugur korun dovortale. Chris Perry, hannem Lorna-k khup tallim diun ani her gavpeanche show dakhoun tachi kola sudhraili, ani Lorna iesache panvdde choddot ravlem. Chris Perry-chea "Nouro Mhozo Deuchar", hea musical show-ant Lorna poilech pavtt Konknni palkar ailem, ani ratiam modhem tem tiatr-pollevpeanchem avddichem zaun gelem. Navelim, Sinquettim ho show zalo tednam itlo public aslo ki mattva bhair than pasun lok tacho avaz aikonk sodhtalo, kaim zonn machie fattlean ieun, te gavpinnik apleak hat diunk zai mhunnon magonk lagle. Lorna-k polleunk ani tache kodden hat mellounk zaitea zonn pixe zatale. Tacho tallo aikopeank pixem laun soddtalo. "Nouro Mhozo Deunchar" show-ache 28 proiog zal'le. Uprant Chris Perry, hannem Lorna vangdda dusro show "Tum ani Hanv" dakhoilo, punn hea show-ak titlem ies favlem nam. Punn he-ui show-ant bes borim gitam aslim, jim azun meren rikorddincher aslelean amchea kanar sadoutat: "Noxibab Roddtam", "Nochom-ia Kumpasar", "Bebdo", "Lisboa", "Sorgar Rajeant", adi. 
Lorna-chem "Saud" kantar itlem lovkik aslem ki Goenkaranchea kazarank dusreanchem sud'dam band aslear, Chris-Lornak fokot hem survatek kantar mhunnon vochat mhunnon vhortale. Hem kantar azunui kazarank gaitat ani tem tachem kantar fuddle pillgek jivem urtelem. Chris Perry-n zaiti khottpott korun Lornachim kantaram HMV-chea rikorddincher kaddlim, ani him gitam hit zalim, uprant HMV komponin anikui Lorna?chim kantaram magon ghetlim ani rikordd kelim. Uprant aplea vangdda gavunk ie mhunnon Lorna-k apounk zaitea songikar aile. Chris Perrz-n, Lornak Hindi songit mollar gavunk soeg dilo. Lorna-n famad Hindi playback singer, Mohamed Rafi, Lata Mangeshkar, Asha Bhosle, hankam chorus gaileat. Chris Perry vangdda Lorna-n dexeant toxe videaxeant musical shows keleat. Taj Hotel, Ritz Hotel ani xevttak Blue Nile, hea 5 nokhetri hotellamnim Lornan gavun, aikopeank dipkaileat. Lorna-n spordheant vantto gheun khup inamam melloilelim asat. Seguid tin vorsam Metro-nt ghoddun haddlelea "Conny Francis Award" spordheant vantto gheun, hem award tannem ubharlem. St. Francis Award spordheantui seguid tin vorsam tannem inam ghetlem. Goenche eke Sounskruttik sounsthen taka ek bhangarachi sallori bhett koxi dil'li asa. Punn serkaran mat kainch diunk nam. Chris Perry ani Lorna, hea zoddpean sangatan Goenkarank moujevont songit dilem, ani aikopeanchi fuddarachi ruch modhench ordhear sanddun tem gelem, anink uprant Lorna portun Konknni palkar dislem nam, nam mhunnon tachea avazan novim gitam ievunk nant. Lorna portun aplo tallo Goenkaranchea kanar sadoit kai? Ho proxnn sogott tiatr mogeank poddlolo asa. Lorna soddeak Dhobitalao, Bombaim aple avoi vangdda ravta. Questions or Comments? Please write to us
at: thegoanreview@goa-world.com Special
Thanks for the arrangements: Gaspar Almeida |
| |||||||||||||||||||||||||||||||||||