|
CARMEN
ROSE
Miss Carmen Rose D'Souza, zaka Konkani palkar Carmen Rose mhunnon pacartale,
tannem sumar 15 vorsa Konkani palkachi seva kelea. Carmel ganvan
Aldonchem, dhuv Bombaintlea famad Goenkar dhondekar-achi, sorgest J.L.
D'Souza, zachim Bombaint kaim hottelam aslim ani Tosa & Co., hacho to ek
baguidar aslo.
1963 vorsa Carmen Rose hannem C.Alvares, hachea eka tiatrant mukhi part
keli. Tednam taka C.Alvares, hannem Miss Rose nanv diun machier
haddlelem. Uprant Alfred Rose, hannem taka aplea tiatrant ghatleam
diun nanv Carmen Rose, jem nanv tannem uprant Konknni palkar chalu dovorlem.
Carmen Rose vortoulem ek borem partist toxem kantorist. Famad
digdorspi J.P. Souzalin, C.Alvares, Jacint Vaz, M.Boyer, Prem Kumar, Alfred
Rose, Remmie Colaco, Robin Vaz, adi. hancheam tiatramni tannem vantto
ghetla.
"Maum ou Kumpar?" ho tiatr tannem boroun palkar dakhoila ani tech
porim tachea bhavacho, Joe Rose, hacho "Guneaum Konnacho?" ho
tiatr tannem digdorxit kel'lo.
Tannem Konknni palkar ani akaxvannicher puskoll gitam gaileant zaum duettam,
trio ani chouke. Tannem Alfred Rose, hachea vangdda gailelem
'Dotor, Dotor, gunvoll ieta' kantar azunui magneam gitant aikopak
mellta.
Ghorabeache ani sirviche zababdarek lagon 1978 vors thaun Carmen Rose,
hannem Konknni palk soddun dilem ani sodeak aplea kuttumba vangdda Parel,
Bombaim jieta.
BAB TONY
Bab Tony ganvan Asaganvcho, put adlea kallacho tiatrist, Paul D'Souza-cho.
Paul D'Souza zaun aslo ek boro kantorist, partist ani tannem tea
kallar tiatr pasun digorxit kel'le.
Bab Tony, Junhachea 3rer 1957 vorsa zolmolo. Tachea nanv Anthony
D'Souza. To huxear kantorist ani parti korpi bhurgo kolakar. Bab
Tony-k lhanponnich than kantar korpachi humead asli. Aplo bapui
tiatrant kantar kortanam to murgott'talo ani ghora ietoch bapaik tem kantar
apnnank mhunnonk laitalo, je vorivim tem kantar dekor korun to apunnui
gaitalo. Bab Tony-chi bhoinn Jacinta kantar korpak huxear asli ani
Prem Kumar-achea eka tiatrant tinnem Xavier, Cecilia
ani Bab Ubaldo, hanchea sangata ek quartet gailelem, jem kantar lokan
portun-portun aikonk maglelem.
Bab Tony poiloch Prem Kumar-achea 'Gorib' tiatrant dixtti poddlo. Hea
tiatrant tannem 'twist' hem Domnic Fernandes, hea tiatristan ghoddun
dilelem kantar mhonnllem. Lokak tachem kantar mhunnop itlem borem
laglem ki taka khup xebaski favo zali. Uprant Prem Kumar-an taka
zaiteam apleam fuddleam tiatramnim ghetlo.
Prem Kumar-achea 'Dukh' tiarant tannem ekdom bori part keli, dekhun taka
inam pasun favo zal'lem.
Nanvoste direkttor C.Alvares, M.Boyer, Alfred Rose, Kid Boxer, Star of
Arrossim, Robin Vaz, hanchea tiatramnim Bab Tony nhesla. Tech porim
Mungllurkaranchea tiatramnim nheson tannem borem nanv melloilelem asa.
C.Alvares, hannem Bab Tony-k Goeam aplea 'Kednam Udetolo To Dis",
"Avoicho Xirap", ani "Honrad Goenkar", heam tiatramnim
velolo, zhoim tannem boreanch nanv komailem. Tea uprant, Alfred
Rose-achea "Rogtak Tanelelo", "Lakhpoti Nouro",
heam tiatramnim bhag ghevpak taka Alfred Rose, hannem 1968 vorsa Goeant
vhelo. Heam donui tiatramnim tannem boreantlem borem ektting kelem.
Anik khup direkttor taka apleam tiatramnim vhoronk ietale, punn tachea
xikpak lagon tacho avoi-bapui taka dhaddunk fattim sortalim. Xikpantui
Bab Tony huxear aslo, ani Mahim-chea St. Micheal iskolant xiktalo.
Songittui to xiklo ani rebek vazounk xiklo.
Uprant Bab Tony anik palkar dislo nam. Sodeak to Bombaim Mahim ravta.
Questions or Comments? Please write
to us at: thegoanreview@goa-world.com
Special
Thanks for the arrangements: Gaspar Almeida
with Fausto V. Da Costa. {Amchea kerit dhinvas Gaspar
Almeida ani Fausto V. Da Costa-k) - Goa-World Team
(Kuwait).
|
|
|
